आयपीएलच्या १७व्या हंगामात दोन संघ वगळता अन्य संघांचे प्रत्येकी ८ सामने झाले आहेत. कोलकाता नाइट रायडर्स आणि सनरायझर्स हैदराबाद या दोन संघांचे प्रत्येकी ७ लढती झाल्या आहेत. काल मंगळवारी झालेल्या लढतीत लखनौ सुपर जायंट्सने चेन्नई सुपर किंग्जचा पराभव केला. या लढतीनंतर पाहा गुणतक्त्यात कोणता संघ कोणत्या स्थानावर आहे.
लखनौ विरुद्धच्या पराभवाचा सर्वात मोठा झटका चेन्नईला बसला आहे. या हंगामात पहिल्यापासून टॉप फोर मध्ये असलेला चेन्नईचा संघ कालच्या पराभवाने टॉप फोरमधून बाहेर जात ते पाचव्या स्थानावर पोहोचले आहेत.
गुणतक्त्यात अव्वल स्थानी राजस्थान रॉयल्स असून त्यांनी ८ पैकी ७ विजयासह १४ गुण मिळवले आहे. राजस्थानचे प्लेऑफमधील स्थान जवळ जवळ निश्चित झाले आहे. आयपीएलचा इतिहास पाहता जो संघ १६ गुण मिळवतो त्याला प्लेऑफचे तिकीट मिळते. राजस्थानच्या अजून ६ लढती शिल्लक आहेत. दुसऱ्या स्थानावर कोलकाता नाइट रायडर्स असून त्यांच्याकडे ५ विजयासह १० गुण आहेत. तिसऱ्या स्थानावर सनरायझर्स हैदराबाद असून त्यांचे देखील १० गुण आहेत. तर चौथ्या स्थानावर असलेल्या लखनौचे देखील १० गुण आहेत.
पाचव्या स्थानावर चेन्नई, सहाव्या स्थानावर गुजरात टायटन्स असून या दोन्ही संघांचे प्रत्येकी ८ गुण आहेत. सातव्या स्थानावर मुंबई इंडियन्स तर आठव्या स्थानावर दिल्ली कॅपिटल्स हे संघ आहेत. त्यांचे प्रत्येकी ६ गुण आहेत. पंजाब किंग्ज नवव्या स्थानावर असून त्यांनी फक्त २ लढती जिंकल्या आहेत. तर अखेरच्या स्थानावर रॉयल चॅलेंजर्स बेंगळुरू असून त्यांना ८ पैकी फक्त एका लढतीत विजय मिळवता आलाय. दिल्ली, पंजाब आणि बेंगळुरूसाठी प्लेऑफमध्ये पोहोचणे कठीण दिसत आहे.