राज्यातील यंत्रमागधारकांना विज बिलात दिल्या जाणाऱ्या अतिरिक्त सवलतीसाठी अजून किती कालावधी प्रतीक्षा करावी लागणार आहे, असा प्रश्न यंत्रमागधारक जागृती संघटनेचे अध्यक्ष विनय महाजन यांनी उपस्थित केला आहे. 13 ऑगस्ट 2024 रोजी झालेल्या मंत्रिमंडळ बैठकीत यंत्रमागधारकांना देण्यात येणाऱ्या विज बिलातील सवलतीसाठी आवश्यक असलेल्या नोंदणीची अट शिथिल करण्याचा निर्णय घेतला गेला होता. परंतु, या निर्णयाचा अध्यादेश अद्याप जारी झालेला नाही.
महाजन यांनी आपल्या निवेदनात सांगितले की, “सरकार स्वतःच्या राजकीय फायद्याचे विषय मंजूर झाल्या झाल्या त्वरित अध्यादेश काढते, मग यंत्रमागधारकांसाठी असा दुजाभाव का होत आहे?” त्यांनी सरकारकडे विनंती केली आहे की, हा अध्यादेश त्वरित काढावा, जेणेकरून यंत्रमागधारकांना दिलासा मिळेल आणि त्यांना येणाऱ्या विज बिलात सवलत मिळू शकेल.
यंत्रमागधारकांसाठी हा अध्यादेश तातडीने काढला गेला नाही तर, ऑगस्ट महिन्याच्या विज बिलात देखील जादा दर लागू होण्याची शक्यता आहे. त्यामुळे, वस्त्रोद्योग सचिवांनी हा अध्यादेश तातडीने जारी करून, यंत्रमागधारकांना दिलासा द्यावा अशी मागणी करण्यात येत आहे.
यंत्रमागधारक जागृती संघटनेने ही सवलत 15 मार्च 2024 पासून लागू करण्यात यावी, अशी मागणी देखील केली आहे. त्यांनी राज्यातील सर्व लोकप्रतिनिधींना आवाहन केले आहे की, त्यांनी हा अध्यादेश लवकरात लवकर काढण्यासाठी प्रयत्न करावेत.
महाजन यांनी सांगितले की, “राज्यातील यंत्रमागधारकांची परिस्थिती गंभीर आहे, आणि या सवलतीशिवाय त्यांना विजेच्या जादा दराचा सामना करावा लागणार आहे. सरकारने हा अध्यादेश तातडीने काढून यंत्रमागधारकांना दिलासा द्यावा.”
विज बिलात मिळणारी ही सवलत यंत्रमागधारकांसाठी मोठा आधार ठरणार असून, या निर्णयाच्या प्रतीक्षेत असलेले यंत्रमागधारक आता शासनाच्या तातडीने कारवाईची अपेक्षा करत आहेत.
हेही वाचा:
देशातील अनेक राज्यांत मुसळधार पाऊस….
कॉँग्रेसचा निष्ठावंत नेता हरपला! नांदेडचे खासदार वसंत चव्हाण यांचं निधन
दररोज सकाळी मिठाचे पाणी प्यायल्याचे फायदे: तज्ज्ञांच्या मते