आधार कार्डवरील फोटो जुना झाला आहे का? मग आता तो सहज अपडेट करता येणार आहे. वय वाढल्यामुळे किंवा चेहऱ्यात झालेल्या नैसर्गिक बदलांमुळे आधार कार्डवरील फोटो आणि सध्याचे रूप यामध्ये फरक निर्माण होऊ शकतो. (Aadhaar card) अशा परिस्थितीत ओळख पडताळणीदरम्यान अडचणी येऊ नयेत यासाठी फोटो अद्ययावत ठेवणे महत्त्वाचे मानले जाते. भारतीय विशिष्ट ओळख प्राधिकरण (UIDAI) नागरिकांना आधार कार्डवरील फोटो बदलण्याची सुविधा उपलब्ध करून देते.
फोटो अपडेट करण्यासाठी नागरिकांना जवळच्या अधिकृत आधार सेवा केंद्राला भेट द्यावी लागते. सध्या ही सुविधा ऑनलाइन उपलब्ध नसल्याने प्रक्रिया प्रत्यक्ष केंद्रावरच पूर्ण करावी लागते. केंद्रावर ‘आधार अपडेट फॉर्म’ भरल्यानंतर संबंधित अधिकाऱ्यांकडून बायोमेट्रिक पडताळणी केली जाते. त्यानंतर केंद्रातच वेबकॅमद्वारे नवीन फोटो काढला जातो. (Aadhaar card) यासाठी नागरिकांना स्वतंत्र फोटो घेऊन जाण्याची गरज नसते. फोटो अपडेटसाठी सरकारकडून निर्धारित शुल्क आकारले जाते आणि अर्जाची पोचपावती देण्यात येते. साधारणपणे ३० दिवसांच्या आत नवीन फोटो आधार डेटाबेसमध्ये अद्ययावत केला जातो.
फोटो काढताना काही नियमांचे पालन करणे आवश्यक असते. फोटो स्पष्ट, रंगीत आणि उच्च गुणवत्तेचा असावा. पार्श्वभूमी स्वच्छ व फिकट रंगाची असणे अपेक्षित आहे. चेहरा, डोळे आणि कान स्पष्ट दिसणे आवश्यक असून चेहऱ्यावर नैसर्गिक भाव असावेत. अति हसणे किंवा दात दाखवणे टाळावे, कारण यामुळे ओळख पटविण्यात अडचणी निर्माण होऊ शकतात. (Aadhaar card) तसेच फोटो काढताना पुरेसा प्रकाश असणेही आवश्यक मानले जाते.विशेष म्हणजे आधार कार्डवरील फोटो बदलण्यासाठी कोणतीही कमाल मर्यादा निश्चित करण्यात आलेली नाही. गरजेनुसार नागरिक कितीही वेळा फोटो अपडेट करू शकतात. केवळ फोटो बदलण्यासाठी स्वतंत्र ओळखपत्र किंवा पत्त्याचा पुरावा सादर करण्याची आवश्यकता नसते. त्यामुळे फोटो जुना झाल्यास किंवा ओळख अधिक अचूक ठेवायची असल्यास नागरिकांनी वेळोवेळी आधार कार्डवरील फोटो अपडेट करण्याचा सल्ला तज्ज्ञांकडून दिला जात आहे.
हेही वाचा :
पाऊस लांबल्यामुळे वाढली पाणीटंचाईची धग
