इचलकरंजी (प्रतिनिधी) –
इचलकरंजीतील पुरवठा कार्यालय गेल्या पंधरा ते वीस दिवसांपासून ठप्प झाल्याची गंभीर बाब समोर आली आहे. यामागचे कारण म्हणजे, सध्या येथे कार्यरत असलेले पुरवठा अधिकारी प्रशिक्षणासाठी गेले असून, त्यांच्या अनुपस्थितीत कोणत्याही अधिकाऱ्याची प्रभारी म्हणून नियुक्ती करण्यात आलेली नाही.
सूत्रांनी दिलेल्या माहितीनुसार, पुरवठा अधिकारी सध्या शासकीय प्रशिक्षणासाठी बाहेर गेले आहेत. मात्र, त्यांची अनुपस्थिती ही नेहमीच्या शासकीय प्रक्रियेचा भाग असल्याने, अशा प्रसंगी नियमानुसार नायब तहसीलदार यांना प्रभारी म्हणून नियुक्त करण्यात येते. पण यावेळी तसे कोणतेही आदेश किंवा उपाययोजना करण्यात आल्या नसल्याचे स्पष्ट झाले आहे.
या प्रशासनिक हलगर्जीपणामुळे नागरिकांचे मोठ्या प्रमाणावर हाल सुरु आहेत. शिधावाटप, अंत्योदय योजना, रेशनकार्ड विषयक तक्रारी व दुरुस्त्या, नवीन अर्ज प्रक्रिया, स्थानिक वितरण व्यवस्थेसंदर्भातील कामे यांसारख्या अनेक सेवांचे कामकाज पूर्णतः ठप्प झाले आहे. अनेक नागरिक कार्यालयात चकरा मारत असूनही त्यांना कोणताही ठोस प्रतिसाद मिळत नसल्याने नाराजी व्यक्त केली जात आहे.
प्रश्नचिन्ह उपस्थित करणारे प्रशासन
या प्रकारामुळे प्रशासनाच्या नियोजन क्षमतेवर मोठे प्रश्नचिन्ह उपस्थित झाले आहे. पुरवठा अधिकारी प्रशिक्षणावर गेले असतानाच त्यांचे कामकाज सुरळीत चालावे यासाठी तात्पुरती व्यवस्था का करण्यात आली नाही, हा प्रश्न सध्या नागरिकांमध्ये चर्चेचा विषय ठरत आहे.
नागरिकांची मागणी – तात्काळ प्रभारी नियुक्त करा
नागरिकांनी मागणी केली आहे की, तत्काळ प्रभारी पुरवठा अधिकारी नेमण्यात यावा, जेणेकरून गरजू आणि लाभार्थ्यांना वेळेवर सेवा मिळू शकेल. अन्यथा याचा थेट फटका समाजातील गरीब व मध्यमवर्गीय घटकांवर पडणार आहे.
महसूल प्रशासनाने या गंभीर बाबीकडे लक्ष देत तात्काळ निर्णय घेणे गरजेचे आहे, अन्यथा नागरिकांमध्ये असंतोष निर्माण होण्याची शक्यता आहे.
