इचलकरंजी शहरासाठी आजचा दिवस अत्यंत महत्त्वपूर्ण ठरला. बसवेश्वर बहुउद्देशीय सहकारी संस्था मर्यादित, इचलकरंजी यांच्या वतीने उभारण्यात आलेल्या शुद्ध पिण्याच्या पाण्याच्या(water) प्रकल्पाचे उद्घाटन आज रविवार, १५ जून २०२५ रोजी मोठ्या उत्साहात पार पडले. महाराष्ट्र सहकार विकास महामंडळ मर्यादित, पुणे यांच्या अटल अर्थसहाय्य योजनेअंतर्गत उभारण्यात आलेल्या या उपक्रमामुळे गावभागातील नागरिकांना आता स्वस्त दरात शुद्ध आणि सुरक्षित पाणी मिळणार आहे.
उद्घाटनप्रसंगी प्रमुख पाहुणे म्हणून भाजपा प्रदेश उपाध्यक्ष व माजी आमदार मा. श्री. सुरेशराव हाळवणकर यांनी उपस्थित राहून प्रकल्पाचे उद्घाटन केले. त्यांनी पाण्याच्या शुद्धतेचे महत्त्व सांगत असे नमूद केले की, “पाण्याच्या शुद्धतेला आहे मोल, कारण जीवन आहे अनमोल.”
या प्रसंगी बसवेश्वर संस्थेचे प्रमुख श्री. अरुण आण्णापा कुंभार, सचिव सौ. मिनाक्षी अरुण कुंभार यांच्यासह विविध क्षेत्रातील मान्यवर, सामाजिक कार्यकर्ते व नागरिक मोठ्या संख्येने उपस्थित होते. कार्यक्रमाची संपूर्ण जबाबदारी अत्यंत नेटकेपणाने पार पाडण्यात आली.
प्रकल्पासाठी वापरण्यात आलेल्या आरओ यंत्रणा, आधुनिक फिल्ट्रेशन सिस्टम आणि पाण्याच्या(water) साठवणुकीसाठी वापरण्यात येणाऱ्या सुविधा यांची पाहणीही यावेळी करण्यात आली. परिसरातील नागरिकांना आता दररोज स्वच्छ आणि रोगमुक्त पाणी सहज उपलब्ध होणार असल्यामुळे समाधान व्यक्त करण्यात येत आहे.
कार्यक्रमाचे आयोजन पी. बा. पाटील मळा, टाकवडे वेस, गावभाग इचलकरंजी येथे करण्यात आले होते. उद्घाटन सोहळा अतिशय उत्साही वातावरणात पार पडला. सामाजिक भान आणि आरोग्याच्या दृष्टीने हे पाऊल आदर्शवत ठरणार असल्याचे मत नागरिकांमधून व्यक्त झाले.
हा प्रकल्प म्हणजे शुद्ध पाण्यासाठीचा एक महत्त्वपूर्ण टप्पा असून, भविष्यात अशा प्रकारचे उपक्रम ग्रामीण व शहरी भागातही राबवले गेले पाहिजेत, अशी अपेक्षा अनेकांनी व्यक्त केली.
हेही वाचा :
उत्तम-प्रकाश टॉकीज चौकात अपघात टळला – सजग नागरिक आणि प्रमोद बचाटे यांच्या तत्परतेने मोठा अनर्थ टळला!
महापालिका रणधुमाळीला प्रारंभ : सुरेश हाळवणकर यांच्याकडून भाजपच्या संभाव्य उमेदवारांची चाचपणी सुरू
