उजनी धरणातील(Dam) पाणी दिवसेंदिवस अधिकाधिक विषारी होत चालल्याने आता ते धरण जणू आयसीयूमध्ये आहे, अशी गंभीर प्रतिक्रिया जलतज्ज्ञ आणि रॅमन मॅगसेसे पुरस्कार विजेते डॉ. राजेंद्र सिंह यांनी व्यक्त केली आहे. पुणे आणि पिंपरी-चिंचवड शहरांमधून दरवर्षी 20 टीएमसी विषारी सांडपाणी उजनी धरणात मिसळले जात असल्याने 117 टीएमसीच्या संपूर्ण जलसाठ्याचे रसायनिक प्रदूषण झाले असून, याचा फटका धरणाखालील भागात राहणाऱ्या लाखो नागरिकांना जाणवतो आहे.
भिगवणमध्ये झालेल्या सभेदरम्यान आणि धरण(Dam) परिसरात पाहणी करताना डॉ. सिंह यांनी या धक्कादायक बाबी उघड केल्या. त्यांनी स्पष्टपणे सांगितले की, धरण परिसरातील अनेक नागरिक कॅन्सर आणि त्वचारोगासारख्या दुर्धर आजारांनी ग्रस्त आहेत. हे गंभीर चित्र पाहता, ही बाब शासनाच्या निदर्शनास आणणे आणि तत्काळ कारवाई करणे अत्यंत आवश्यक असल्याचे त्यांनी नमूद केले.
उजनी धरणाच्या परिसरात फिरून पाहणी केल्यानंतर डॉ. सिंह यांनी धरणाच्या तळात साचलेल्या पांढऱ्या रंगाच्या थराकडे लक्ष वेधले. त्यांच्या म्हणण्यानुसार, हे थर म्हणजेच उद्योगधंद्यांमधून येणाऱ्या रसायनांचे अवशेष आहेत. पुणे आणि पिंपरी-चिंचवडमध्ये स्वस्त दरात शुद्ध पाणी मिळते आणि तिथून निघालेले सांडपाणी उजनी धरणात मिसळते, ही परिस्थिती अन्यायकारक आहे. उजनी परिसरातील नागरिकांना मात्र एका रुपयाला लिटर पाणी खरेदी करावे लागत आहे – ही बाब त्यांनी जाहीर सभेतून मांडली.
राज्य सरकारने याकडे गांभीर्याने लक्ष देऊन, या जलप्रदूषणाला रोखण्यासाठी पावले उचलली पाहिजेत. हे केवळ पाण्याचे प्रदूषण नाही, तर संपूर्ण जलव्यवस्थेचा ऱ्हास असल्याचा इशारा त्यांनी दिला. उजनी धरणाचा उपयोग पिण्याच्या पाण्यासाठी तसेच शेतीसाठी होतो, त्यामुळे हे पाणी सुरक्षित ठेवणे अपरिहार्य असल्याचे ते म्हणाले.
उजनी धरणातील(Dam) पाण्याच्या वाढत्या प्रदूषणाबाबत बोलताना डॉ. सिंह म्हणाले की, सरकारने जर दुर्लक्ष केले, तर याचा परिणाम केवळ आरोग्यावर नव्हे तर जैवविविधतेवरही होईल. जलचर प्राणी मृत्युमुखी पडत असून, धरणातील पाणी आता पिण्यायोग्य राहिलेले नाही. त्यांनी सांगितले की, ही वेळ लोकांनी एकत्र येऊन पाणी वाचवण्यासाठी उभारायची आहे. सामाजिक कार्यकर्ते, शेतकरी, युवक – सर्वांनीच यात पुढाकार घेतला पाहिजे.
लोकप्रतिनिधींनी विधानसभेत पाण्याविषयी आवाज उठवण्याची गरज असून, उजनीतील समस्या केवळ स्थानिक नाही तर संपूर्ण राज्यासाठी एक धोक्याची घंटा आहे. ‘ही वेळ विकासाच्या नावे विनाश टाळण्याची आहे’, असा स्पष्ट इशारा डॉ. राजेंद्र सिंह यांनी दिला.
हेही वाचा :
तुझं डोकं ठिकाणावर असतं का? लहान भावावर भडकला रोहित शर्मा, Video Viral
मोठी बातमी! मुंबई विमानतळावर ISIS च्या 2 दहशतवाद्यांना अटक
दारू पिऊन नवऱ्याने बायकोला केली बेदम मारहाण; छतावरून उलटे लटकावले अन् हादरवणारा Video Viral
