पश्चिम आशियात पुन्हा एकदा तणावाचा भडका उडाला असून इराण आणि अमेरिका यांच्यात सुरू असलेल्या संघर्षामुळे जागतिक स्तरावर अस्थिरता वाढत आहे. या युद्धाला महिना उलटून गेला तरीही तोडगा निघण्याची कोणतीही चिन्हे दिसत नाहीत. शांततेसाठी होणाऱ्या प्रयत्नांनाही धक्का बसला असून (ongoing conflict) दुसरी महत्त्वाची बैठक रद्द करण्यात आली आहे. दरम्यान, जगातील सर्वात महत्त्वाच्या तेलवाहतुकीच्या मार्गांपैकी एक असलेल्या होर्मुज खाडी परिसरात परिस्थिती अधिकच गंभीर बनली आहे. या खाडीभोवती अमेरिकेने कडक नाकेबंदी केल्याने ती जवळपास पूर्णपणे बंद झाली आहे, ज्याचा थेट परिणाम जागतिक ऊर्जा पुरवठ्यावर होत आहे.
होर्मुज खाडी बंद झाल्याने आंतरराष्ट्रीय बाजारात कच्च्या तेलाच्या किमतीत झपाट्याने वाढ झाली आहे. त्यामुळे अनेक देश आर्थिक तणावाखाली आले असून ऊर्जा संकट अधिक गडद होत चालले आहे. याच पार्श्वभूमीवर इस्त्रायल आणि लेबनान यांच्यातील संघर्ष पुन्हा तीव्र झाला आहे. लेबनानच्या आरोग्य मंत्रालयाच्या माहितीनुसार, दक्षिण लेबनानमध्ये रविवारी इस्त्रायलने केलेल्या हल्ल्यात 14 नागरिकांचा मृत्यू झाला, तर 37 जण गंभीर जखमी झाले आहेत. विशेष म्हणजे, युद्धसंधी जाहीर झाल्यानंतरही अशा प्रकारचे हल्ले सुरूच असल्याने परिस्थिती अधिकच चिंताजनक बनली आहे.
इस्त्रायलच्या संरक्षण दलाने मात्र वेगळी माहिती देत, त्यांच्या वायुसेनेने हिजबुल्लाह या संघटनेचे तीन ड्रोन पाडल्याचा दावा केला आहे. पश्चिम गॅलिली भागात सायरन वाजल्यानंतर हे ड्रोन सीमेत प्रवेश करण्याआधीच नष्ट केल्याचे सांगण्यात आले. मात्र, लेबनानकडून हा दावा फेटाळण्यात आला आहे. त्याचबरोबर इस्त्रायलने दक्षिण लेबनानमधील काही गावांतील नागरिकांना स्थलांतर करण्याचा इशाराही दिला होता, ज्यामुळे स्थानिकांमध्ये भीतीचे वातावरण निर्माण झाले आहे.
दरम्यान, या संपूर्ण संघर्षात पाकिस्तान मध्यस्थीची भूमिका बजावण्याचा प्रयत्न करत आहे. युद्धबंदी घडवून आणण्यासाठी पाकिस्तानमध्ये पहिली बैठक पार पडली, मात्र त्यातून कोणताही ठोस निर्णय निघाला नाही. त्यानंतरची दुसरी बैठकही रद्द करण्यात आली आहे, ज्यामुळे शांतता प्रक्रियेला मोठा धक्का बसला आहे.
एकीकडे इराण-अमेरिका संघर्ष, तर दुसरीकडे इस्त्रायल-लेबनान तणाव आणि त्यात होर्मुज खाडीतील अडथळा या सर्व घटनांमुळे जागतिक परिस्थिती अधिकच गंभीर बनली आहे. ऊर्जा पुरवठा, अर्थव्यवस्था आणि आंतरराष्ट्रीय राजकारण या तिन्ही स्तरांवर या संघर्षाचे परिणाम दिसू लागले असून पुढील काही दिवसांत परिस्थिती आणखी चिघळण्याची शक्यता व्यक्त केली जात आहे.
हेही वाचा
बायपास झाल्याचे माहित असूनही छातीवर हल्ला, रत्नागिरीत जुन्या वादातून हत्या 17 दिवसांनी आरोपी अटकेत