मुंबई: बॉलिवूड अभिनेता सैफ अली खानविरोधातील सुमारे १२ वर्षांपूर्वीच्या खटल्यात साक्ष देण्यासाठी हजर राहण्याचे निर्देश वारंवार देऊनही गैरहजर राहणारी अभिनेत्री मलायका अरोरा(Malaika Arora) हिला मुख्य महानगर न्यायदंडाधिकारी न्यायालयाने अखेरची संधी देत, अजामीनपात्र वॉरंट बजावण्याचा इशारा दिला आहे.
‘समन्स जारी करूनही मलायका अरोरा न्यायालयातील कार्यवाहीसाठी येण्याचे जाणीवपूर्वक टाळत आहे. यापूर्वी समन्स अव्हेरल्याने पहिले जामीनपात्र वॉरंट १५ फेब्रुवारी रोजी जारी केले होते. तरीही ८ एप्रिलला गैरहजर राहिल्याने पुन्हा जामीनपात्र वॉरंट जारी करून २९ एप्रिल रोजी हजर राहण्याचे निर्देश दिले होते.
पुन्हा मलायका(Malaika Arora) गैरहजर राहिली आहे. त्यामुळे ती खटल्याच्या कार्यवाहीसाठी जाणीवपूर्वक येत नसल्याचे स्पष्ट होते. तिला अखेरची संधी देण्यात येत आहे. आता ९ जुलै रोजीच्या सुनावणीला गैरहजर राहिल्यास अजामीनपात्र वॉरंट बजावले जाईल’, असे मुख्य न्यायदंडाधिकारी के.एस. झंवर यांनी २९ एप्रिलच्या आदेशात स्पष्ट केले.
एका हॉटेलमध्ये अनिवासी भारतीय व्यावसायिकाला मारहाण केल्याच्या आरोप प्रकरणी सैफ व त्याच्या दोन मित्रांविरोधात हा खटला सुरू आहे. पोलिसांनी दाखल केलेल्या गुन्ह्याप्रमाणे, ‘२२ फेब्रुवारी २०१२ रोजी सैफ हा त्याची पत्नी करिना कपूर खान, मेहुणी करिष्मा कपूर तसेच मलायका व अमृता अरोरा आणि काही मित्रांसोबत रात्रीच्या भोजनासाठी गेला होता.
त्यावेळी कर्णकर्कश गप्पांमुळे होणाऱ्या त्रासाबद्दल व्यावसायिक इक्बाल मिर शर्मा यांनी हटकल्यानंतर सैफ व दोन मित्रांनी त्यांना धमकावले. तसेच त्यांच्या नाकावर ठोसा लगावला. त्यांनी शर्मा यांचे सासरे रमण पटेल यांनाही मारहाण केली’. त्याउलट ‘शर्मा यांनी करीना व अन्य महिलांविषयी अपशब्द वापरल्याने भांडण होऊन गोंधळ निर्माण झाला होता’, असा दावा सैफने केला.
हेही वाचा :
आता देशवासियांचे लक्ष लष्कराच्या प्रत्यक्ष कृतीकडे
पुढच्या वर्षीही IPL खेळणार? CSK च्या कर्णधाराचे हसत-हसत उत्तर
उन्हाळ्यात ‘या’ भाजीचा रस शरीर ठेवतो थंड पोटाच्या समस्यांवर रामबाण उपाय, जाणून घ्या
