भारतीय वायु सेनेने पाकिस्तान आणि पाकिस्तान व्याप्त काश्मीरमध्ये रात्री उशिरा केलेल्या कारवाईनंतर, सामान्य नागरिकांमध्ये त्यांच्या दैनंदिन व्यवहारांवर होणाऱ्या परिणामांबद्दल अनेक प्रश्न उपस्थित झाले आहेत. ‘ऑपरेशन सिंदूर’(Operation Sindoor) नंतर शाळा, प्रवास आणि इतर सेवा कशा चालतील याबद्दलची माहिती येथे दिली आहे.
भारतीय सुरक्षा यंत्रणा(Operation Sindoor) उच्च दक्षतेवर असल्या तरी, बहुतांश राज्यांमध्ये परिस्थिती सामान्य ठेवण्यात आली आहे. शाळांसंदर्भात अद्याप कोणतीही देशव्यापी सूचना जारी करण्यात आलेली नाही, त्यामुळे जम्मू-काश्मीर वगळता इतर राज्यांतील पालक आपल्या मुलांना शाळा प्रशासनाकडून खात्री करून शाळेत पाठवू शकतात. शिक्षण संस्थांनी सुट्टी जाहीर केली आहे का, हे तपासून पाहणे महत्त्वाचे आहे.
बँका आणि शेअर बाजार त्यांच्या नियोजित वेळापत्रकानुसार कार्यरत राहतील अशी अपेक्षा आहे, कारण त्यांच्या कामकाजात कोणताही बदल झाल्याची अधिकृत घोषणा नाही. नागरिकांनी कोणत्याही अफवांवर विश्वास न ठेवता आपले आर्थिक व्यवहार नेहमीप्रमाणे सुरू ठेवावेत. तसेच, अत्यावश्यक वस्तूंचा साठा करण्याची किंवा एटीएममधून गरजेपेक्षा जास्त पैसे काढण्याची आवश्यकता नाही, कारण देशात स्थिती पूर्णपणे नियंत्रणात आहे.
सध्या भारतात हवाई प्रवास सुरक्षित असला तरी, काही विशिष्ट शहरांमधील विमान उड्डाणांवर तात्पुरते निर्बंध घालण्यात आले आहेत. एअर इंडियाने जम्मू , श्रीनगर, लेह, जोधपूर, अमृतसर, भूज, जामनगर, चंदीगड आणि राजकोट येथून येणाऱ्या व जाणाऱ्या विमानांची उड्डाणे ७ मे रोजी दुपारी १२ वाजेपर्यंत स्थगित केली आहेत.
या मार्गांवरील प्रवाशांनी प्रवास सुरू करण्यापूर्वी संबंधित विमान कंपनीकडून अद्ययावत माहिती घ्यावी. अमृतसरला जाणारी दोन आंतरराष्ट्रीय विमानांना दिल्लीकडे वळवण्यात आले आहे. दुसरीकडे, रेल्वे सेवांवर कोणताही परिणाम झालेला नाही आणि रेल्वे वाहतूक संपूर्ण देशात सुरळीतपणे सुरू आहे. रेल्वेने कोणत्याही विशिष्ट मार्गावर किंवा भागासाठी प्रवासासंबंधी सूचना जारी केलेली नाही.
हेही वाचा :
आज गजकेसरी योग! ‘या’ 5 राशींना धनलाभ होणार
सोन्याच्या किंमतीवरही पाकिस्तान हल्ल्याचा परीणाम, तब्बल 4 हजारांनी वाढला भाव
भारताने पाकिस्तानमध्ये केलेल्या हल्ल्यानंतर शरद पवारांची मोठी प्रतिक्रीया; म्हणाले…
