राज्यातील बारामती विधानसभा मतदारसंघ आणि राहुरी विधानसभा मतदारसंघ येथे झालेल्या पोटनिवडणुकीसह देशातील इतर महत्त्वाच्या राज्यांमध्ये पार पडलेल्या मतदानामुळे राजकीय (political) वातावरण तापले आहे. 23 एप्रिल रोजी महाराष्ट्राबरोबरच पश्चिम बंगाल आणि तामिळनाडू येथेही मोठ्या उत्साहात मतदान झाले. या सर्व निवडणुकांचे निकाल 4 मे रोजी जाहीर होणार असल्याने राजकीय पक्षांसह मतदारांचेही लक्ष आता निकालांकडे लागले आहे.
पश्चिम बंगालमध्ये पहिल्या टप्प्यातील मतदानाने विक्रमी टक्का गाठत सर्वांचे लक्ष वेधले. तब्बल 91 टक्क्यांहून अधिक मतदान झाल्याने ही निवडणूक अत्यंत चुरशीची ठरणार असल्याचे स्पष्ट झाले आहे. राज्यात तृणमूल काँग्रेस आणि भारतीय जनता पक्ष यांच्यात थेट लढत पाहायला मिळत असून मुख्यमंत्री ममता बॅनर्जी यांची प्रतिष्ठा पणाला लागली आहे. मोठ्या प्रमाणावर झालेल्या मतदानामुळे मतदारांनी बदलाचा संकेत दिला आहे का, की सत्ताधाऱ्यांवर विश्वास कायम ठेवला आहे, याबाबत विविध अंदाज वर्तवले जात आहेत.
तामिळनाडूमध्येही चांगला प्रतिसाद मिळत 82 टक्क्यांपेक्षा जास्त मतदान झाले. त्यामुळे दक्षिण भारतातील या महत्त्वाच्या राज्यातही निकालांबाबत अनिश्चितता कायम आहे. दोन्ही राज्यांतील मतदानाची टक्केवारी पाहता मतदारांनी सक्रिय सहभाग नोंदवला असून राजकीय समीकरणांमध्ये बदल होण्याची शक्यता व्यक्त केली जात आहे.
महाराष्ट्रातील बारामती आणि राहुरी पोटनिवडणुकीकडेही विशेष लक्ष लागले आहे. सायंकाळपर्यंत बारामतीत 52 टक्क्यांहून अधिक तर राहुरीत सुमारे 50 टक्के मतदान नोंदवले गेले. बारामतीत उपमुख्यमंत्री सुनेत्रा पवार यांना सर्वपक्षीय पाठिंबा मिळाल्याची चर्चा असून त्यांचा विजय जवळपास निश्चित मानला जात आहे. तरीही अंतिम निकाल येईपर्यंत राजकीय घडामोडींवर सर्वांचे लक्ष केंद्रित राहणार आहे.
आता 4 मे हा दिवस निर्णायक ठरणार असून या निवडणुकांमधून मतदारांनी नेमका कोणता कौल दिला आहे, हे स्पष्ट होईल. विशेषतः पश्चिम बंगालमधील सत्तासंघर्षाचा निकाल देशाच्या राजकारणावर दूरगामी परिणाम करणारा ठरू शकतो.
हेही वाचा
राहुरी-बारामती पोटनिवडणुकीसाठी आज मतदान; सुनेत्रा पवार आणि अक्षय कर्डिले यांचं भवितव्य ठरणार