भविष्यात आर्थिक स्थैर्य मिळवण्यासाठी वेळेवर बचत आणि योग्य गुंतवणूक करणे अत्यंत महत्त्वाचे ठरते. नियमित उत्पन्नातून काही रक्कम बाजूला ठेवून दीर्घकालीन योजनांमध्ये गुंतवणूक केल्यास (investments) भविष्यात मोठा निधी तयार होऊ शकतो. अशाच विश्वासार्ह योजनांपैकी एक म्हणजे पब्लिक प्रोव्हिडंट फंड (PPF), ज्यामध्ये सुरक्षिततेसह आकर्षक परतावा मिळतो.
पोस्ट ऑफिसमार्फत उपलब्ध असलेल्या पीपीएफ योजनेत सध्या ७.१ टक्के दराने व्याज दिले जाते. या योजनेची खासियत म्हणजे गुंतवणुकीवर मिळणारे व्याज तसेच मुदतपूर्तीनंतर मिळणारी रक्कम पूर्णपणे करमुक्त असते. त्यामुळे ही योजना कर बचतीसाठीही फायदेशीर ठरते. आयकर कायद्यातील कलम ८०सी अंतर्गत दरवर्षी १.५ लाख रुपयांपर्यंतच्या गुंतवणुकीवर करसवलत मिळते.
या योजनेचा कालावधी १५ वर्षांचा असून गुंतवणूकदार इच्छेनुसार पुढील ५ वर्षांसाठी तो वाढवू शकतो. केवळ ५०० रुपयांपासून गुंतवणूक सुरू करता येते, तर एका वर्षात जास्तीत जास्त १.५ लाख रुपये जमा करता येतात. नियमित गुंतवणूक केल्यास मोठा निधी तयार होऊ शकतो.
उदाहरणार्थ, जर एखाद्या गुंतवणूकदाराने दरवर्षी १.५ लाख रुपये १५ वर्षांसाठी जमा केले, तर एकूण गुंतवणूक २२.५ लाख रुपये होते. यावर ७.१ टक्के दराने व्याज मिळाल्यास मुदतपूर्तीनंतर सुमारे ४०.६८ लाख रुपये मिळू शकतात. म्हणजेच या गुंतवणुकीतून सुमारे १८.१८ लाख रुपये फक्त व्याजाच्या स्वरूपात मिळतात. सुरक्षितता, करसवलत आणि दीर्घकालीन स्थिर परतावा यामुळे पीपीएफ योजना आजही गुंतवणूकदारांमध्ये लोकप्रिय ठरत आहे. भविष्यातील आर्थिक गरजा पूर्ण करण्यासाठी ही योजना एक प्रभावी पर्याय मानली जाते.
हेही वाचा
बायपास झाल्याचे माहित असूनही छातीवर हल्ला, रत्नागिरीत जुन्या वादातून हत्या 17 दिवसांनी आरोपी अटकेत