देशभरातील व्यावसायिकांना आजपासून मोठा आर्थिक धक्का बसला असून कमर्शियल एलपीजी गॅस सिलेंडरच्या दरात मोठी वाढ करण्यात आली आहे. आंतरराष्ट्रीय तणाव, विशेषतः इराण-अमेरिका संघर्ष आणि होर्मुज खाडीतील अनिश्चिततेमुळे एलपीजी पुरवठ्यावर दबाव निर्माण झाल्याचे सांगितले जात आहे. (major financial blow) त्यामुळे 19 किलोच्या कमर्शियल सिलेंडरच्या किमतीत मोठी वाढ झाली असून हॉटेल, रेस्टॉरंट, खानावळ आणि लहान व्यावसायिकांवर त्याचा थेट परिणाम होणार आहे.
1 मे 2026 पासून लागू झालेल्या नव्या दरानुसार 19 किलोच्या कमर्शियल सिलेंडरची किंमत तब्बल 993 रुपयांनी वाढली आहे. त्यामुळे आधी सुमारे 2078 रुपयांना मिळणारा सिलेंडर आता 3071 रुपयांपर्यंत पोहोचला आहे. एका महिन्यात झालेली ही विक्रमी वाढ मानली जात असून व्यापाऱ्यांमध्ये चिंता व्यक्त केली जात आहे.
घरगुती ग्राहकांना मात्र सध्या काहीसा दिलासा मिळाला आहे. सरकारने घरगुती वापराच्या एलपीजी सिलेंडरच्या दरात कोणताही बदल केलेला नाही. त्यामुळे सर्वसामान्य नागरिकांना तातडीचा फटका बसलेला नसला तरी कमर्शियल सिलेंडर महागल्यामुळे बाहेरच्या खाण्यापिण्याच्या वस्तू महाग होण्याची शक्यता आहे.
विशेषतः हॉटेल व्यावसायिक, मिठाई दुकानदार, केटरिंग व्यवसाय आणि छोटे खाद्यपदार्थ विक्रेते यांच्यासाठी ही वाढ चिंताजनक मानली जात आहे. वाढलेल्या गॅस दरामुळे अनेक ठिकाणी पदार्थांच्या किमती वाढवल्या जाऊ शकतात. त्यामुळे ग्राहकांच्या खिशावरही अप्रत्यक्ष भार पडणार आहे.
जागतिक स्तरावर होर्मुज खाडीतील तणावामुळे इंधन आणि गॅस वाहतूक विस्कळीत होण्याची भीती व्यक्त केली जात आहे. भारतात सध्या परिस्थिती नियंत्रणात असली तरी आयात पुरवठा दीर्घकाळ अडथळ्यात राहिला तर पुढील काळात घरगुती सिलेंडरच्या दरातही वाढ होण्याची शक्यता नाकारता येत नाही. त्यामुळे आगामी महिन्यांत एलपीजी दरांवर सर्वांचे लक्ष लागले आहे.
हेही वाचा
उदयनराजे भोसले रुग्णालयात दाखल; डॉक्टरांनी दिली प्रकृतीबाबत अपडेट
कोल्ड ड्रिंकसोबत चिप्स खाताय? होऊ शकतो मोठा परिणाम, पहिले हे वाचा