राज्यात अवकाळी पावसाचा जोर ओसरताच आता उन्हाचा तडाखा (unseasonal rains) पुन्हा जाणवू लागला आहे. गेल्या काही दिवसांतील पावसामुळे वातावरणात थोडा दिलासा मिळाला होता, मात्र आता तापमानात झपाट्याने वाढ होत असून अनेक भागांमध्ये उष्णतेची लाट येण्याची शक्यता व्यक्त करण्यात आली आहे. हवामान खात्याने पुढील ७२ तास नागरिकांनी विशेष काळजी घेण्याचा इशारा दिला असून अत्यावश्यक कामाशिवाय घराबाहेर पडू नये, असा सल्लाही देण्यात आला आहे.
कोकण किनारपट्टी भागात सध्या पावसाची शक्यता नसली तरी दमट हवामानामुळे उकाडा अधिक त्रासदायक ठरणार आहे. मुंबईसह ठाणे, रत्नागिरी आणि सिंधुदुर्ग या जिल्ह्यांमध्ये किमान तापमान २४ ते २६ अंशांच्या दरम्यान राहणार असून कमाल तापमान ३२ ते ३४ अंशांपर्यंत जाण्याचा अंदाज आहे. दुपारच्या वेळेत उन्हाचा चटका आणि घामामुळे नागरिकांना उष्णतेचा अधिक त्रास जाणवू शकतो.
मध्य महाराष्ट्रात मात्र परिस्थिती अधिक तीव्र राहण्याची शक्यता आहे. पुणे, सांगली, सातारा, कोल्हापूर आणि सोलापूर या जिल्ह्यांमध्ये सकाळी थोडासा गारवा जाणवेल, पण दुपारनंतर तापमानात मोठी वाढ होऊन ते ३६ ते ३८ अंशांपर्यंत पोहोचू शकते. विशेषतः सांगली आणि सोलापूरसाठी उष्ण व दमट हवामानाचा ‘यलो अलर्ट’ जारी करण्यात आला असून नागरिकांनी सतर्क राहण्याचे आवाहन करण्यात आले आहे.
दरम्यान, मुंबईतील हवामान आज उष्ण आणि दमट राहणार आहे. शहराचे तापमान सकाळी सुमारे २८ अंशांवर नोंदवले गेले असून कमाल तापमान ३० अंशांपर्यंत जाण्याची शक्यता आहे. सकाळी ६ वाजून २२ मिनिटांनी सूर्योदय झाला असून सायंकाळी ६ वाजून ५४ मिनिटांनी सूर्यास्त होणार आहे. आर्द्रतेचे प्रमाण ५७ टक्क्यांवर असून त्यामुळे उकाड्याची तीव्रता अधिक जाणवते आहे.
याशिवाय, हवेच्या गुणवत्तेबाबतही चिंता वाढली आहे. मुंबईतील हवा गुणवत्ता निर्देशांक १५४ इतका नोंदवला गेला असून तो ‘Poor’ श्रेणीत मोडतो. PM 2.5 आणि PM 10 कणांचे प्रमाण वाढल्यामुळे श्वसनासंबंधित त्रास असलेल्या नागरिकांनी विशेष काळजी घेण्याची गरज आहे. गरज असल्यासच बाहेर पडावे, मास्कचा वापर करावा आणि दुपारच्या कडक उन्हात बाहेर जाणे टाळावे, असे आवाहन तज्ज्ञांकडून करण्यात येत आहे.
एकंदरीत, राज्यात पावसाचा कालावधी संपताच उन्हाळ्याची तीव्रता पुन्हा वाढताना दिसत आहे. त्यामुळे पुढील काही दिवस नागरिकांनी उष्माघात टाळण्यासाठी पुरेसे पाणी पिणे, हलके व सैल कपडे वापरणे आणि थेट सूर्यप्रकाशात जाणे टाळणे अत्यंत गरजेचे ठरणार आहे.
हे ही वाचा;
एसटी प्रवास महागणार, हंगामी वाढ १५ एप्रिलपासून; किती रुपयांनी वाढले आकडेवारी आली
सहलीला गेली अन् घात झाला, 15 वर्षांच्या मुलीचा दरीत सापडला मृतदेह, पालकांनो ‘या’ 5 चुका टाळा
८व्या वेतन आयोगाबाबत महत्वाची अपडेट, कोणत्या फॉर्म्युलानुसार पगार किती रुपायांनी वाढणार?