मध्य-पूर्वेत वाढलेल्या तणावाच्या पार्श्वभूमीवर भारताने आंतरराष्ट्रीय मंचावर आपली ठाम भूमिका मांडली आहे. संयुक्त राष्ट्र महासभा येथे झालेल्या चर्चेदरम्यान भारताने होर्मुज खाडीत सुरू असलेल्या (backdrop) अस्थिरतेबाबत तीव्र चिंता व्यक्त करत जहाजांवरील हल्ल्यांचा कडक शब्दांत निषेध केला.
भारताचे प्रतिनिधी हरीश पी यांनी स्पष्टपणे सांगितले की, होर्मुज खाडीतील परिस्थिती ही केवळ प्रादेशिक नाही तर जागतिक पातळीवरील ऊर्जा आणि व्यापार सुरक्षेसाठी गंभीर आव्हान बनली आहे. या खाडीतून मोठ्या प्रमाणावर भारताची कच्चे तेल आणि एलपीजीची आयात होते, त्यामुळे येथे निर्माण झालेला तणाव थेट देशाच्या ऊर्जा सुरक्षेवर परिणाम करणारा ठरत आहे.
गेल्या काही दिवसांत होर्मुज खाडीत व्यापारी जहाजांना लक्ष्य करून हल्ले झाल्याच्या घटनांनी भारताची चिंता वाढवली आहे. भारतीय जहाजे आणि खलाशांच्या सुरक्षेचा मुद्दा उपस्थित करत भारताने स्पष्ट केले की, नौकानयनाच्या स्वातंत्र्यात अडथळा आणणारी कोणतीही कृती स्वीकारार्ह नाही. निष्पाप खलाशांचे जीव धोक्यात घालणाऱ्या या घटनांवर तात्काळ आळा घालण्याची मागणीही भारताने केली.
दरम्यान, होर्मुज खाडी ही जागतिक व्यापारासाठी अत्यंत महत्त्वाची जलमार्ग असल्याने येथे निर्माण झालेली अस्थिरता अनेक देशांना फटका देत आहे. इराण आणि अमेरिकेमधील संघर्षानंतर परिस्थिती अधिकच बिघडली असून, काही काळासाठी खाडीतील वाहतूकही विस्कळीत झाली होती. परिणामी जागतिक बाजारपेठेत अस्थिरता निर्माण झाली असून, ऊर्जा दरात चढ-उतार दिसून येत आहेत.
भारताने या संपूर्ण परिस्थितीत सर्व संबंधित देशांना संयम बाळगण्याचे आणि तणाव टाळण्याचे आवाहन केले आहे. युद्धाऐवजी संवाद आणि राजनैतिक मार्गाने तोडगा काढण्यावर भारताने भर दिला आहे. आंतरराष्ट्रीय कायद्याचे पालन करत होर्मुज खाडीतील सुरक्षितता तातडीने पुनर्संचयित करावी, अशी ठाम भूमिका भारताने मांडली आहे.
या घडामोडींमुळे भारतासह अनेक देशांच्या अर्थव्यवस्थेवर परिणाम होण्याची शक्यता व्यक्त केली जात असून, ऊर्जा पुरवठा साखळी सुरळीत ठेवण्यासाठी जागतिक पातळीवर प्रयत्नांची गरज अधोरेखित होत आहे.
हेही वाचा
धक्कादायक! तक्रारदार महिलेकडे शरीरसुखाची मागणी, पोलिसाच्या कृत्याने संताप
मोठी बातमी! महाराष्ट्रात पुन्हा धुरळा उडणार, विधान परिषदेच्या १७ जागांची लवकरच निवडणूक
करदात्यांसाठी महत्त्वाची बातमी! आयटीआर फॉर्म भरण्याच्या नियमात मोठे बदल