अकोला जिल्ह्यात एका तरुणीच्या अपहरण आणि बेकायदेशीररित्या कैदेत ठेवल्याच्या प्रकरणामुळे मोठी खळबळ उडाली आहे. (illegal imprisonment) नाशिक आणि अमरावतीनंतर आता अकोल्यातही अशाच स्वरूपाची घटना समोर आल्याचा आरोप काही संघटनांकडून करण्यात आला असून, या प्रकरणाला ‘लव्ह जिहाद’ची जोड दिली जात आहे. मात्र, पोलिसांकडून अद्याप अधिकृत तपास सुरू असून सर्व बाबींची चौकशी केली जात आहे.
मिळालेल्या माहितीनुसार, अकोल्यातील जमीर जाहीरउद्दीन काझी नावाचा युवक विवाहित असून त्याला एक मूलही आहे. तो एका गेमिंग ॲपवर ‘बादशाह’ या नावाने बनावट प्रोफाइल वापरत असल्याचा आरोप आहे. या माध्यमातून त्याची हरियाणातील एका तरुणीशी ओळख झाली. ओळख वाढल्यानंतर संबंधित तरुणीला प्रेमाच्या आमिषाने अकोल्यात बोलावण्यात आल्याचे सांगितले जात आहे. त्यानंतर तिला गीता नगर परिसरातील घरात पाच दिवस ठेवण्यात आल्याचा आरोप समोर आला आहे.
तरुणी बेपत्ता झाल्यानंतर तिच्या कुटुंबीयांनी हरियाणात तक्रार दाखल केली होती. तिचा भाऊ अकोल्यात येऊन स्थानिक खदान पोलिसांशी संपर्क साधल्यानंतर संपूर्ण प्रकार उघडकीस आला. पोलिसांनी तातडीने कारवाई करत तरुणीची सुटका केली असून आरोपी युवकाला ताब्यात घेतले आहे. पुढील चौकशीसाठी त्याला हरियाणा पोलिसांच्या स्वाधीन करण्यात येणार असल्याची माहिती सूत्रांनी दिली आहे.
या घटनेनंतर परिसरात काही काळ तणावाचे वातावरण निर्माण झाले होते. विश्व हिंदू परिषदेसह काही हिंदू संघटनांच्या कार्यकर्त्यांनी पोलीस ठाण्यात गर्दी करत या प्रकरणाचा सखोल तपास करण्याची मागणी केली. तरुणीला पाच दिवस घरात ठेवण्यात आले असताना आरोपीच्या कुटुंबीयांना याची माहिती होती का, तसेच या काळात नेमके काय घडले, याचा तपास व्हावा अशी मागणी करण्यात आली आहे.
दरम्यान, पोलिसांनी नागरिकांना अफवांवर विश्वास न ठेवण्याचे आवाहन केले असून तपास पूर्ण झाल्यानंतरच सत्य परिस्थिती स्पष्ट होईल, असे सांगितले आहे. या प्रकरणामुळे अकोला जिल्ह्यात मोठी चर्चा रंगली असून सर्वांचे लक्ष आता तपासाच्या निष्कर्षाकडे लागले आहे.
हेही वाचा
अरविंद केजरीवाल यांचा …….न्यायासाठी सत्याग्रह ?.
पोलादी सुरक्षा व्यवस्था …..जेव्हा भेदली जाते…
‘राजा शिवाजी’मधील लहान मुलाच्या त्या सीनवर कात्री सेन्सॉर बोर्डाने सुचवले हे मोठे बदल