राज्यात स्थानिक स्वराज्य संस्थांच्या सार्वत्रिक निवडणुकांची रणधुमाळी वेग घेत आहे. आगामी नगरपरिषद आणि नगरपंचायत निवडणुकीसाठी प्रशासनाकडून तयारीला गती मिळाली असून, मतदारांना निर्विघ्न मतदान करता यावे यासाठी महाराष्ट्र शासनाने 2 डिसेंबर 2025 रोजी सार्वजनिक सुट्टी जाहीर केली आहे. ही सुट्टी(holiday) कोणत्या भागात लागू आहे आणि शैक्षणिक संस्थांची स्थिती काय राहणार, याबाबत प्रशासनाकडून महत्त्वाची माहिती देण्यात आली आहे.
राज्यातील 246 नगरपरिषद आणि 42 नगरपंचायतींसाठी 2 डिसेंबर रोजी मतदान तर 3 डिसेंबर रोजी मतमोजणी होणार आहे. या निवडणुकांसाठी संबंधित जिल्ह्यांतील जिल्हाधिकाऱ्यांनी अधिकृतपणे सार्वजनिक सुट्टी(holiday) जाहीर केली आहे. शासन, अर्धशासकीय कार्यालये, सार्वजनिक उपक्रम, बँका आणि संबंधित संस्थांसाठी ही सुट्टी बंधनकारक असेल. विशेष म्हणजे, आपल्या मतदारसंघाच्या हद्दीबाहेर नोकरी करणाऱ्या नोंदणीकृत मतदारांनाही या सुट्टीचा लाभ घेता येणार आहे.
निवडणुकीसाठी नियुक्त केलेल्या अधिकारी व कर्मचाऱ्यांना मतदानाच्या एक दिवस आधी म्हणजेच 1 डिसेंबर रोजी मतदान केंद्रांवर पोहोचून तयारी करावी लागणार आहे. त्यामुळे मतदान केंद्र म्हणून वापरल्या जाणाऱ्या शाळा, महाविद्यालये आणि इतर शैक्षणिक संस्थांना 1 आणि 2 डिसेंबर 2025 रोजी सार्वजनिक सुट्टी लागू राहील. या दिवशी सर्व शैक्षणिक कामकाज बंद राहणार असल्याचे जिल्हाधिकाऱ्यांनी स्पष्ट केले आहे.
यामुळे संबंधित नगरपरिषदांच्या हद्दीतील हजारो विद्यार्थी आणि शिक्षकांना दोन दिवसांची सुट्टी(holiday) राहणार आहे. मतदानासाठी आवश्यक साहित्य, EVM, सुरक्षा व्यवस्था आणि इतर तांत्रिक तयारीसाठी या संस्थांचा वापर करण्यात येणार असून, स्वतंत्र खोल्या मतदान प्रक्रियेसाठी आरक्षित ठेवण्यात येतील.
पुणे जिल्ह्यातील आळंदी, बारामती, भोर, चाकण, दौंड, फुरसुंगी–उरळी देवाची, इंदापूर, जेजुरी, जुन्नर, लोणावळा, माळेगाव बुद्रुक, मंचर, राजगुरुनगर, सासवड, शिरूर, तळेगाव दाभाडे आणि वडगाव या नगरपरिषद व नगरपंचायत मतदारसंघांमध्ये 2 डिसेंबर रोजी सार्वजनिक सुट्टी लागू राहणार आहे. या मतदारसंघातील नोंदणीकृत मतदारांना मतदान करता यावे म्हणून कार्यालयांना व बँकांना सुट्टी देण्यात आली आहे.
तसेच, या भागातील मतदान केंद्र म्हणून निवडलेल्या शाळांना 1 आणि 2 डिसेंबर रोजी सुट्टी राहील. जिल्हाधिकारी कार्यालयाकडून याबाबत स्पष्ट आदेश काढण्यात आले असून, सर्व विभागांना सूचना देण्यात आल्या आहेत.
नाशिक जिल्ह्यातील इगतपुरी, नांदगाव, त्रिंबक, येवला, सिन्नर, सटाणा, चांदवड, भगुर, ओझर, पिंपळगाव बसवंत आणि मनमाड या 11 नगरपरिषद क्षेत्रांमध्येही याच तारखेला सुट्टी जाहीर करण्यात आली आहे. जिल्हाधिकारी आयुष प्रसाद यांनी आदेश निर्गमित केले असून, मतदान केंद्र असलेल्या परिसरातील शैक्षणिक संस्थांना दोन दिवस विश्रांती असेल.
मतदान प्रक्रिया शांततेत आणि पारदर्शकतेने पार पाडण्यासाठी सुरक्षा यंत्रणांना विशेष सूचना देण्यात आल्या आहेत. पोलिस, निवडणूक कर्मचारी आणि सहाय्यक दल मतदानाच्या तयारीसाठी सज्ज झाले आहेत.
स्थानीय स्वराज्य संस्था ही लोकशाहीची मूलभूत पायरी असल्याने नागरिकांनी मोठ्या संख्येने मतदान करून सहभाग नोंदवावा, असे आवाहन निवडणूक अधिकाऱ्यांनी केले आहे. या सार्वत्रिक निवडणुकीमुळे अनेक नगरपरिषदा आणि नगरपंचायतींमध्ये नवीन स्थानिक नेतृत्व उदयास येणार असून, प्रशासनाकडून निवडणुकीच्या तयारीला अंतिम स्वरूप दिले जात आहे.
मतदानाचा हक्क पार पाडण्यासाठी शासकीय यंत्रणा युद्धपातळीवर काम करत आहे. मतदारांनी शांततेत, सुरक्षितपणे आणि विनाअडथळा मतदान करण्याचे आवाहन प्रशासनाच्या वतीने करण्यात आले आहे.
हेही वाचा :
‘मी लग्न करायला तयार, पण फक्त मुलगी….’, युजवेंद्र चहल पुन्हा बोहल्यावर चढायला तयार
एका प्रेमीसाठी 5 मुलींमध्ये झाली हाणामारी! कपडे खेचले, झिंज्या उपटल्या अन्… Video Viral
हृदय हेलावणारी घटना, 20 चिमुकल्यांना अंगणवाडीत कोंडून ठेवलं; आक्रोश कॅमेऱ्यात कैद!