कुरुंदवाड (ता. शिरोळ) — खिद्रापूर येथील प्राचीन कोपेश्वर मंदिरात(Temple) बुधवारी त्रिपुरारी पौर्णिमेनिमित्त पारंपरिक उत्साहात दीपोत्सवाचा अद्भुत सोहळा साजरा करण्यात आला. हजारो दिव्यांच्या प्रकाशाने मंदिर परिसर उजळून निघाला आणि भक्तिभाव व सौंदर्याचा संगम अनुभवायला मिळाला.
सायंकाळी सुर्यास्तानंतर भक्तांच्या हातून दिवे प्रज्वलित होताच मंदिराच्या प्रत्येक कोपऱ्यात प्रकाशाचा सागर उसळला. स्वर्गमंडप, सभा मंडप, गाभारा, तसेच बाहेरील रस्त्यांवर दिव्यांची रांगोळी सजवून भक्तांनी पारंपरिक संस्कृतीचे दर्शन घडवले. स्थानिक महिलांनीही पारंपरिक पेहरावात दीपप्रज्वलनात सहभागी होत भक्तीचा उत्सव अधिक रंगतदार केला.
प्रकाशाच्या मंद झळाळीत मंदिरातील प्राचीन शिल्पांची अप्रतिम शोभा खुलून दिसत होती. अनेक भाविकांनी हे मनोहर दृश्य मोबाईलच्या कॅमेऱ्यात कैद केले. रात्री उशिरा आकाशात कोनशिलेच्या मध्यभागी आलेला पूर्णचंद्र आणि खाली तेजोमय कोपेश्वर मंदिर — हा अद्वितीय योगायोग पाहण्यासाठी भाविकांनी गर्दी केली होती.प्रकाश, श्रद्धा आणि शांतीचा हा संगम पाहून अनेकांच्या डोळ्यांत भावनांचे अश्रू दाटले. कोपेश्वर मंदिरातील (Temple)हा दीपोत्सव केवळ दृश्य सोहळा नव्हता, तर श्रद्धेचा आणि परंपरेचा एक जिवंत अनुभव होता.
हेही वाचा :
निवडणुका जाहीर झाल्या! राजकीय हालचाली वाढल्या!
PhonePe वापरकर्त्यांसाठी मोठी बातमी! कंपनीने केली ‘ही’ महत्त्वाची घोषणा
बिटकॉईनमध्ये गुंतवणुकीची हीच योग्य वेळ? पडझडीचा होणार फायदा