महाराष्ट्रात ऑटो-रिक्षा आणि टॅक्सी चालकांसाठी मराठी भाषा अनिवार्य करण्याच्या दिशेने राज्य सरकारने एक महत्त्वपूर्ण पाऊल उचलले आहे. यासाठी महाराष्ट्र मोटार वाहन नियम, १९८९ मधील काही नियमांमध्ये (significant) बदल करण्याचा प्रस्ताव तयार करण्यात आला असून, चालकांना मराठी भाषेचे व्यावहारिक ज्ञान असणे आवश्यक ठरणार आहे. परिवहन विभागाने हा प्रस्ताव तयार करून गृह विभागाकडे सादर केला असून, लवकरच यासंदर्भातील मसुदा अधिसूचना जारी होण्याची शक्यता आहे.
या प्रस्तावानुसार, सार्वजनिक सेवा वाहन चालविण्याचा परवाना देताना अर्जदाराच्या मराठी भाषेच्या ज्ञानाची तपासणी केली जाणार आहे. त्यामुळे चालक आणि प्रवासी यांच्यातील संवाद अधिक सुलभ होईल, असा सरकारचा विश्वास आहे. विशेषतः मीटर असलेल्या टॅक्सींसाठी परवाना मिळवताना मराठी भाषेचे ज्ञान ही अतिरिक्त अट लागू होणार आहे. तसेच, परवाना नूतनीकरणाच्या वेळीही चालकांना मराठी भाषेचे ज्ञान असल्याचा पुरावा सादर करावा लागणार आहे. त्यामुळे सध्या सेवा देत असलेल्या चालकांनाही नव्या नियमांचे पालन करावे लागणार आहे.
भाषेच्या अडचणीमुळे अनेकदा प्रवासी आणि चालकांमध्ये गैरसमज निर्माण होतात. या समस्येवर तोडगा काढण्यासाठी हा निर्णय महत्त्वाचा ठरणार असल्याचे सांगितले जात आहे. राज्य सरकारचा उद्देश स्थानिक भाषेला प्रोत्साहन देत प्रवाशांना त्यांच्या मातृभाषेत अधिक सोयीस्कर आणि मैत्रीपूर्ण सेवा मिळावी हा आहे.
राज्याचे परिवहन मंत्री प्रताप सरनाईक यांनी याबाबत बोलताना सांगितले की, सार्वजनिक वाहतूक व्यवस्था अधिक परिणामकारक आणि नागरिकाभिमुख करण्यासाठी सरकार सातत्याने प्रयत्न करत आहे. स्थानिक भाषेचा वापर वाढवून प्रवाशांचा अनुभव अधिक चांगला करण्याचा सरकारचा प्रयत्न असल्याचे त्यांनी स्पष्ट केले.
हेही वाचा
आप पक्षाला मोठा धक्का राघव चड्ढासह 7 खासदारांचा भाजपमध्ये प्रवेश
ऐकायला कमी येतंय, आहारात या पदार्थांचा समावेश करा दिसून येईल फरक
27 एप्रिलला सर्वात दुर्मिळ योग, 3 लकी राशींचं नशीब फळफळणार, पैशांचा पाऊस पडणार?