मुख्याध्यापकाकडून होणाऱ्या लैंगिक छळाला कंटाळली, अल्पवयीन लायब्ररीत गेली आणि..

Bysmartichi

Nov 25, 2025

छत्तीसगडमधील जशपूर जिल्ह्यात घडलेली ही धक्कादायक घटना संपूर्ण परिसराला हादरवून गेली आहे. एका खासगी शाळेतील अल्पवयीन विद्यार्थिनीने शाळेच्या अभ्यासिकेत गळफास घेऊन आत्महत्या केली. या आत्महत्येमागील कारण अधिकच संतापजनक आहे—मुख्याध्यापकाकडून (principal)होत असलेला सततचा लैंगिक छळ, छेडछाड आणि मानसिक त्रास. विद्यार्थिनीने आत्महत्या करण्यापूर्वी सुसाईड नोट लिहून ठेवली होती, ज्यामुळे या प्रकरणाची गंभीरता अधिक वाढली आहे.
प्रकरण काय आहे?

मिळालेल्या माहितीनुसार, विद्यार्थिनी शाळेच्या अभ्यासिकेत फाशी घेतलेल्या अवस्थेत सापडली. शाळेतील कर्मचाऱ्यांनी हे पाहताच तातडीने बगीचा पोलीस स्टेशनला याची माहिती दिली. पोलीस घटनास्थळी दाखल झाले आणि मृतदेह खाली उतरवून पंचनामा केला. त्यानंतर मृतदेह शवविच्छेदनासाठी पाठवण्यात आला. घटनास्थळीच पोलिसांना विद्यार्थिनीची सुसाईड नोट मिळाली, जी या प्रकरणातील सर्वात महत्त्वाचा पुरावा ठरली.

सुसाईड नोटमध्ये विद्यार्थिनीने मुख्याध्यापकावर (principal)गंभीर आरोप केले आहेत. मुख्याध्यापक वारंवार लैंगिक छळ करत होते,छेडछाड आणि अनुचित वर्तन करत होते,तसेच तिला मानसिक त्रास देत होते,अशा प्रकारच्या अत्याचारांमुळेच ती जगण्याचा आत्मविश्वास गमावून बसल्याचे विद्यार्थिनीने स्पष्ट लिहिले आहे. मुख्याध्यापकाच्या दबावाला आणि त्रासाला कंटाळून तिने हे टोकाचे पाऊल उचलल्याचे सुसाईड नोटमधून समोर आले आहे.सुसाईड नोट मिळाल्यानंतर पोलिसांनी एक क्षणही दवडला नाही. मुख्याध्यापकांविरुद्ध लैंगिक अत्याचार, छेडछाड आणि आत्महत्येला प्रवृत्त केल्याचा गुन्हा नोंदवून त्यांना तात्काळ अटक करण्यात आली आहे. आरोपीची पोलीस कोठडी मागण्यात येणार असून, घटनेचा सखोल तपास सुरू आहे.

या प्रकरणामुळे बगीचा पोलीस स्टेशनच्या हद्दीत संतापाची लाट उसळली आहे. गावकरी, पालक आणि विद्यार्थी मोठ्या संख्येने शाळेबाहेर जमा झाले असून, आरोपींवर कठोर कारवाईची मागणी करत आहेत. शाळा ही विद्यार्थ्यांसाठी सुरक्षित जागा असावी, पण इथेच असा भयानक प्रकार घडल्याने सर्वत्र चिंतेचे वातावरण निर्माण झाले आहे.ही घटना गुरु-शिष्य नात्याला लागलेला काळा डाग ठरत असून, तातडीने अशा गुन्ह्यांना रोखण्यासाठी कठोर पावले उचलण्याची मागणी होत आहे.